Gewilde skeppende slypskool terug by Taalmonument
Vir diegene wat dalk soms ʼn bietjie dig voel as hulle pen op papier of vinger op sleutelbord plaas om ʼn gedig op te tower, bied die Afrikaanse Taalmuseum en -monument (ATM) weereens ʼn poëtiese oplossing. Dit is naamlik ʼn daglange, interaktiewe werkswinkel met die geliefde digkunskenner prof Bernard Odendaal op SATERDAG, 9 NOVEMBER 2024, wat vir die eerste keer in jare weer fisiek by die monument aangebied word.
Die genotvolle dag, aangebied in samewerking met die ATKV-Skryfskool van die Noordwes-Universiteit, sal verskeie aspekte van digkuns bespreek asook ʼn praktiese afdeling waarin daar aan deelnemers se gedigte geskaaf sal word. Aangesien die werkswinkel gemik is op belangstellendes wat reeds dig, maar kundigheid oor hoe om hul gedigte beter en treffender te maak wil opdoen, word hulle aangemoedig om van hul gedigte byderhand te hou. Odendaal se kursusse word gekenmerk deur ’n gemaklike atmosfeer waar die klem nie op kritiek nie, maar juis op opbouende dialoog en voorstelle ter verbetering val.
As direkteur van die ATKV-Skryfskool is hy ’n deskundige op die gebied van die Afrikaanse digkuns en self ’n gepubliseerde digter, liedteksskrywer en essayis. Odendaal sal die gesprek lei, met verwysing na ʼn gidsboek wat vooraf beskikbaar gestel sal word aan ingeskrewenes. Van die vrae wat onder die loep geneem gaan word, is: waarom skryf mense gedigte; wat onderskei gedigte van ander soorte skryfwerk; verskil liedtekste en gedigte enigsins van mekaar; en op grond waarvan kan ’n mens die kunsgehalte van ʼn gedig bepaal?
Die kursus vind by die Taalmonument op Paarlberg vanaf 09:00 tot 16:30 plaas en kos slegs R150 per persoon wat ʼn gratis besoek aan die monument asook verversings, materiaal en bywoningsertifikate insluit. Deelnemers kan hul eie middagete bring of die Suikerkan-bistro ondersteun, waar hulle 10%-afslag ontvang. Plekke is beperk, dus bespreek asseblief vroegtydig by Stefanie Rasztabiga via 021 872 3441 of kommunikasie@taalmuseum.co.za.
- Vir meer inligting oor al die opwindende geleenthede, konserte en kursusse by die Taalmonument en Taalmuseum, skakel 021 872 3441/863 0543, besoek taalmonument.co.za of volg hulle op Facebook. Die webtuiste bied boonop virtuele toere van die monument en museum, inligting in ses tale oor die simboliek van die Taalmonument asook baie interessante artikels oor Afrikaans, veeltaligheid en die instelling se verlede, hede en toekoms. Daar is voorts heelwat bronne vir skool- en navorsingsprojekte. Jaarpermitte kos slegs R120 vir individue of R220 per gesin, wat onbeperkte toegang tot die ATM, bistro en Volmaanpieknieks insluit. Die bistro bied daagliks heerlike kos en pragtige vergesigte; kontak hulle via diesuikerkan.co.za of 082 216 2510.
